சிக்கலின் எதிர்விகிதம் பிரிவு (பிரிவுα1/சிக்கல்)

வம்பு, வசவு, களிப்பு, கண்ணீர்,

வாய்ச் சண்டை, வலுச் சண்டை

வரவேற்க வரவைத்த போலி புன்னகை,

தரங்கெட்ட மனிதர், தவறான சேர்க்கை,

தொலைவின் எதிர்விகிதம் தொல்லை, சிக்கல்கள்,

விலைபோகும் நன்றிகள், விலைகேட்கும் உதவிகள்,

வேண்டாத பேச்சுகள், வேதனைபெரு மூச்சுகள்,

காண்கின்ற கண்களை ஏமாற்றும் கானல்கள்,

பரிவு வேண்டினால் பரிகசிக்கும் உலகு-நம்

சரிவு வருமிடத்து மகிழும் உள்ளங்கள்,

பிரிவு நம்மை இவற்றில் பிரிப்பதால்,

பிரிவு கள்கூட பிரியத்துக் குரியவை!!

தமிழ் வாழ்க!

வெங்கனலில் தங்கமென இலங்குமொழி

சிங்கமென வீரங் கொண்ட வேந்தர்

வங்கமெனும் ஏரி நீந்தும் நாவாய் கொண்டு

எங்கும் கொடி நாட்டி வந்த வீரர் கூட்டம்!

சங்கத்தமிழ் புலவர்; சங்கனையச் சிற்பம்

மங்காதப் புகழ்; மனமகிழக் கூத்து

சங்கடந் தீர்க்கும் விருந்தோம்பல்- உலகைப்

பங்கு கேட்ட உரமிக்க தோள்கள்!

இங்ஙனம் யாவும் பெற்ற என் தமிழே- நீ

யாங்கணும் என்றும் வாழிய நின்று!

புதியதோர் உலகம்?

இயற்கையை இரசிப்பதை நிறுத்தி

கட்டடக் காடுகளைக் கண்டு களித்தேன்!

இருப்பதை இரசிப்பதே இயற்கை அன்றோ?

இயந்திரங்கள், வாகனங்கள்,

இரண்டொரு பறவைகள்,

இவற்றோடு குப்பை

இதற்கிடையே சாலை!

விண்தொடும் பதாகைகள்,

வேடமிடும் நாகரிகம்,

கண்கவர் முகமூடியில் 

கயமை சுமக்கும் மக்கள்!

வேகத்திற்கு விற்கப்பட்ட மனிதர்கள்,

வேதனையில் மூச்சுவிடும் மரங்கள்!

தாகத்திற்கு நீரும் காசாக

தரிசானது மனதுடன் மண்ணும்!

வழுக்கை விழுந்த மலைகள்,

வாழ்க்கை தொலைத்த விலங்குகள்!

“வறண்டு போனது கண்ணீரும்,”

வருத்தம் சொல்லும் வானம்!

இருந்த மலர்க்காட்டை

இரக்கமின்றி அழித்துவிட்டு

இரண்டொரு மலர்க்கொடியில்

இதம் தேடும் இழிவு!

இதுவா புது உலகம்?

இதையா எதிர்பார்த்தோம்?

மாற்றம் நிலை என்பதால்,

மனிதனும் மாறலாம் மனிதனாய்!
எதிர்பார்ப்போம்...

கடவுளின் கடைசிமூச்சு!

அடிநாள் தொட்டு அவனியின் தந்தை

     அவனெனக் கூறிய ஆக்கங்கள் அழிய,

விடிவான் வெள்ளிபோல் விஞ்ஞானம் விடைபகர,

     விழுதாய் தாங்கிநின்ற பொய்மையெலாம் அடிசாய,

சாத்திரங்கள் நாட்டி வைத்த அடிமைமுறைச் சாக,

     சாதிமதச் சார்புகள் சவக்குழிக்குப் போக,

ஏழ்மை நிலையெல்லாம் எழுத்தல்ல எனஉணர,

     ‘இன்று நாள் எப்படி’கள் இறப்பைத் தேட,

வசிப்பதாய்ச் சொன்ன வான்நோக்கி மனிதன்வர,

     வரமெனச் சொன்னதை வலுவிலா அவன்செய்ய,

கருணைகொண்ட சுற்றாடல் சட்டென கழுத்துநெரிக்க,

     கடைசிமூச்சு விட்டு கடவுள் செத்துப்போனார்!

வேகப்பயணம்(?!)

வேகப் பயணமோ? – தீயினில்

வேகப் பயணமோ? - நொடியினில்

சாகப் பயணமோ? – உறவுகள்விட்டு

போகப் பயணமோ?

மோகம் போகுமோ? – வேகத்தின்

தாகம் போகுமோ?- மரணத்தின்

இராகம் சாகுமோ? – மனிதத்தின்

பாகம் சாகுமோ?

தேகம் வாழவோ – உற்றாரின்

சோகம் சாகவோ – உங்கள்

வேகம் கொல்லுங்கள் – நெடுநாள்

வாழ்ந்துச் செல்லுங்கள்!

சில தாக்கங்கள்

ஆறாகக் கண்கள், ஆறாதப் புண்கள்,

தீராத வலியோடு தீனமாக அலறும் நினைவு!

தொட்டிலைத் துறக்க மறுத்த மனம்

விட்டிலை போல் வீட்டைச் சுற்ற,

விடியலில் விழிக்கையில் வெருட்டி நின்ற

கொடிதானப் பள்ளியும் சடுதியில் பழகிப்போக,

அடிநாள் வசந்தத்தின் மலரான நட்பு வாட,

“அன்பால் பிரியாமல் ஊழிவரை உற்றிருப்போம்”,

என்பதாய்ச் சொன்ன இறைநட்பு இறந்துபோக,

இடைவேளை மறந்துபோன மரணங்கள் மரத்துப்போக

இடையறாது கலந்துகொண்ட போட்டிகளும் இயல்பாய்மாற

விடைதெரியா வினாக்களோடு வாழ்வெனும் வினாத்தாளில்

விசும்பலாய் நின்றன இவற்றின் தாக்கங்கள் மட்டும்!!

ஐம்பூதங்கள்

பரிசாய் இயற்கைதந்த பசுமை நிலமெல்லாம்

தரிசாய் தரமிழந்து பணமுதலைகள் பாற்பட்டு,

கட்டடக் காடுகளாய், கண்கவர் மாளிகையாய்

சட்டத்தின் கல்லறையில் உருக்குலைந்து உடன்புதைய,

மாந்தனின் கொடுமைகண்டு வண்ணக்கண்ணீர் வடித்தது,

வேந்தனின் சினம்போல் வெள்ளமாய்ஓடிய மாஜிஆறு!

பேதைஉலக மதைச் சாய மெனக்கூற- உப்புகரித்தது நீர்

கடல்நீர் உள்ளீட்டால்அல்ல; அந்த மலைமகளின் கண்ணீரால்!

கரியமிலம், கந்தகம் கக்கும் தொழிலகங்கள்

சரியாக அவற்றையே திரும்பத் துப்பும்வாகனங்கள்;

வெருட்டும் அவற்றின் அரக்கப் பார்வையில்

சுருண்டு விழுந்து மூர்ச்சித்தது காற்று!

உயர்மரம் என்னும் உறவினர் இறக்க

ஊடல் கொண்டது வானிடம் மேகம்!

நிறத்தை மாற்றும் மனிதர் சேர்க்கையால்

அனாதை ஆனது அகண்ட வானமும்!

நன்மை பயக்கும் தொழிலினை விடுத்து,

நானிலந் தன்னை தீய்த்தது நெருப்பு!

தீய மனிதரின் தீக்குணம் கண்டு

தீயும் அஞ்சி வெந்து மாண்டது!

மனிதத்தை வாழ்விக்க வந்த பூதங்கள்

மனிதனால் நசிந்து மரணத்தை எதிர்நோக்க,

பதவிக்கு வந்தன- கையூட்டு, ஊழல்,

கவலை, வேலையின்மை, பொய்மை என

பழமையில் புழுத்த புதியஐம் பூதங்கள்!

ஊடகங்களில் தமிழ்

“விடுதலை வெல்லும் எம்தமிழ்”, என்று

விளம்பி நின்றது ஊடகம் அன்று!

பாமரத் தமிழில் பத்திரிகை செய்திகூற,

பாரிலுள்ள நூலெல்லாம் பைந்தமிழில் மொழிமாற,

நாளேடு, நூலோடு வானொலியும் தமிழ்வளர்க்க,

நயவஞ்சக வடவர்மொழி நம்மொழிக்கு தீதென்று

திறமிகு பணிசெய்து தனித்தமிழ் வேண்டிநின்ற

திராவிடத்தால் திரையிலும் திளைத்தது தமிழ்!

மேற்கின் மேகங்கள் பெருமழை பொழிய,

மெல்லத் தமிழ்பயிர் வெள்ளத்தில் அழிய,

அற்றம் தருகின்ற ஆங்கிலம் சுமந்து

அறிவிப் பாளர்கள்அலை வரிசையை அணிசெய்ய,

குற்றுயிராக்கிப் பின்முதுகில் குத்தினாற் போல்

போட்டியிட்டு தமிழ்கொன்று, போதகர் போல்நின்று

போட்டிகள் வைப்பர், தனித்தமிழ் பேச்சுக்கென்று!

கண்ணுறக் கூடா இக்கடிதான காட்சிகண்டு

கண்மூடி இறக்கும் கன்னித்தமிழ்- அதனைக்

காண்போம் நேரலையாய் தொலைக்காட்சி யினில்!

இத்தனை இழிவுகள் இல்லாமற் செய்ய- கடு

கத்தனை அளவு முயற்சிகள் போதும்!

எத்தனை முயன்றும் தனித்தமிழ் செய்வோம்- நம்

இன்னுயிர் தந்தும் நம்மொழி காப்போம்!

மக்களை விழுங்கும் ஊடகம் உடைத்து,

மக்களுக்கான ஊடகம் சமைப்போம்- தமிழ்

மக்களுக்கான புது ஊடகம் படைப்போம்!